អត្ថបទបន្ថែម
រមណីយដ្ឋានល្អាងភ្នំបាក់ – តំបន់ធម្មជាតិ ៖ ល្អាងភ្នំប្រាក់ ដែលស្ថិតក្នុងភូមិវឿនសៀន ឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង នៅតែជាចម្ងល់ស្រាយមិនចេញ របស់អ្នកភូមិ និងភ្ញៀវទេសចរ ដែលបានទៅទស្សនា ពីមូលហេតុនៃការកកើតរបស់វា។
បើតាមប្រធានសហគមន៍អេកូទេសចរណ៍តំបន់អូរស្វាយ បានប្រាប់ថា រហូតមកទល់ពេលនេះ ពុំទាន់មាននរណាម្នាក់ដឹងពីមូលហេតុ នៃការកកើតល្អាងនេះនៅឡើយទេ មិនដឹងថាវាកើតដោយធម្មជាតិ ឬក៏មនុស្សជាអ្នកដាប់ថ្មធ្វើ។ វាមានប្រវែងរាប់រយម៉ែត្រ បត់បែនប្រៀបដូចជាដានពស់ ឬនាគ។ បុរសវ័យ ៥២ឆ្នាំ បានបន្តថា៖ «តាំងពីខ្ញុំធំឡើង ឆ្លងកាត់សម័យសង្គ្រាមមកដល់ពេលនេះ ខ្ញុំក៏ឃើញល្អាងភ្នំប្រាក់បែបនេះរហូតមក ហើយពេលសួរចាស់ៗ ក៏ពួកគាត់មិនដឹងដូចគ្នា”។
យោងតាមអ្នកនាំភ្ញៀវទេសចរនៅរមណីយដ្ឋានអូរស្វាយ ក៏បានលើកឡើងផងដែរថា អ្នកស្រីក៏មិនបានដឹងពីប្រវត្តិនៃការកកើតល្អាងភ្នំប្រាក់នេះដូចគ្នា។ ល្អាងភ្នំប្រាក់នេះស្ថិតនៅកណ្តាលព្រៃសហគមន៍ដែលក្លាយជាតំបន់ដ៏អស្ចារ្យសម្រាប់បោះជំរំកម្សាន្ត។ រហូតដល់ពេលនេះ មានភ្ញៀវទេសចរតិចតួចបំផុតបានទៅដល់ទីនោះ រួមទាំងភ្ញៀវបរទេស ២ឬ៣នាក់ ក៏ធ្លាប់ទៅផ្ដិតរូបភាពដែរ ហើយក៏មិនដឹងមូលហេតុ។ រីឯឯកសារក៏គ្មានផងដែរ ដូច្នេះហើយទើបវានៅតែចម្ងល់មួយ រហូតដល់សព្វថ្ងៃ។
ល្អាងភ្នំប្រាក់ ស្ថិតនៅជើងភ្នំប្រាក់ មានចម្ងាយប្រហែល ១៨គីឡូម៉ែត្រ ពីប្រជុំជនឃុំអូរស្វាយ។ ដើម្បីទៅដល់ល្អាងភ្នំមួយនេះ ភ្ញៀវទេសចរត្រូវធ្វើដំណើរដោយជិះទូកតាមដៃទន្លេមេគង្គ រយៈពេលប្រហែល១ម៉ោង ទើបដល់ភូមិវឿនសៀន រួចបន្តធ្វើដំណើរដោយថ្មើរជើង ឬជិះគោយន្តចូលទៅព្រៃ ៣គីឡូម៉ែត្រទៀត៕
អត្ថបទពេញនិយមបន្ទាប់ ៖ រមណីដ្ឋានទឹកធ្លាក់ល្បាក់ខោន ឬ សុភមិត្រ – តំបន់ធម្មជាតិ
