អំពីកម្ពុជា ៖ ប្រទេសកម្ពុជា ឬ ប្រទេសខ្មែរ មានឈ្មោះជាផ្លូវការ ព្រះរាជាណាចក្រកម្ពុជា ជាប្រទេសដែលមានប្រព័ន្ធគ្រប់គ្រងបែបលទ្ធិប្រជាធិបតេយ្យ អាស្រ័យរដ្ឋធម្មនុញ្ញ។ កម្ពុជាមានផ្ទៃក្រឡាសរុប ១៨១,០៣៥ ម៉ែត្រការ៉េ លាតសន្ធឹងក្នុងរាងពហុកោណស្ទើរស្មើជ្រុងដែលមានចំណុចកណ្ដាលក្បែរកំពង់ធំ និងមានប្រវែងពីជើងទៅត្បូងជិតស្មើនឹងប្រវែងពីកើតទៅលិច ។ ហើយប្រវែងអតិបរមានៃបណ្ដោយ និងទទឹងគឺ ៥៦០ គម និង ៤៤០ គម ។ ព្រះរាជាណាចក្រកម្ពុជាមាន ទីតាំងស្ថិតនៅភូមិភាគអាស៊ីអាគ្នេយ៍ ខាងត្បូងឧបទ្វីបឥណ្ឌូចិន មានព្រំដែនជាប់ប្រទេសថៃ ប្រទេសឡាវ និងជាប់ប្រទេសវៀតណាមនិងលាតសន្ធឹងលើឈូងសមុទ្រថៃ។ ភ្នំពេញត្រូវបានគេហៅថា «គុជនៃតំបន់អាស៊ី» ជារាជធានីរបស់កម្ពុជាដែលមានប្រជាជនប្រហែល២លាននាក់។
ព័ត៌មានខ្លីៗស្តីពីប្រទេសកម្ពុជា
ឈ្មោះជាផ្លូវការ: ព្រះរាជាណាចក្រកម្ពុជា
ឈ្មោះកាត់: កម្ពុជា
រាជធានី: ភ្នំពេញ
ប្រជាជន: ចំនួន ១៥ លាននាក់
ផ្ទៃដី: ១៨១ ០៣៥ km2.
រូបិយវត្ថុ: រៀល ; ១ USD = ៤២00 រៀល; ដុល្លារ US អាចប្រើបានច្រើនកន្លែង
ភាសា: ខ្មែរ; អង់គ្លេស ត្រូវបានប្រើច្រើននៅទីប្រជុំជន
សាសនា: ពុទ្ធសាសនា (៩0%), សាសនាឥស្លាម និងគ្រឹស្ត និង ការជឿលើដួងវិញ្ញាណ
ផ្កាតំណាងជាតិៈ ផ្ការំដួល
អគ្គីសនីៈ វ៉ុលស្តង់ដារគឺ ២៣០ វ៉ាត់ហើយហ្វ្រេកង់មានកម្រិត 50Hz
ក្រុមជាតិពន្ធ: ខ្មែរ, ចិន, វៀតណាម, ចាម និង ផ្សេងៗ
ប្រវត្តិសាស្ត្រកម្ពុជា
ដោយសារតែការអាក់ខាននៃការសិក្សាស្រាវជ្រាវពីបុរេប្រវត្តិរបស់ប្រទេសកម្ពុជាទើបមិនមានអ្នកណាម្នាក់បាន ដឹងអោយប្រាកដថា តើប្រជាជនខ្មែរបានរស់នៅលើទឹកដីរបស់ខ្លួនតាំងពីពេលណាមក។ បើតាមផ្ទាំងសិលាស្ថិតក្នុង រូងភ្នំនៅភាគខាងជើងនៃប្រទេសកម្ពុជាបានអោយដឹងថាមនុស្សដែលបានប្រើប្រាស់ដុំថ្មធ្វើជាឧបករណ៍បានរស់នៅ ក្នុងរូងភ្នំតាំងពីដើមសតវត្សទី៤០០០មុនគ.សហើយដំណាំស្រូវត្រូវបានដាំដុះនៅលើទឹកដីកម្ពុជាតាំងតែពីមុនសតវត្ស ទី១នៃព.សមកម្លេះ។ អានបន្ត »
ទីតាំងភូមិសាស្ត្រ
ប្រទេសកម្ពុជាមានផ្ទៃដី ១៨១ ០៣៥ គីឡូម៉ែតការ៉េ មានព្រំដែនដីគោក ខាងជើងនិងខាងលិច ជាប់ប្រទេសថៃ ៨០០គ.ម ជាប់ប្រទេសឡាវ ៥៤១គ.មភាគខាងឥសាន និងជាប់ប្រទេសវៀតណាម ១២២៨គ.មភាគខាងកើតនិងអាគ្នេយ៍។ ព្រំដែនសមុទ្រលាតសន្ធឹងលើឈូងសមុទ្រថៃ ប្រវែង៤៤៣គ.ម។ ប្រទេសកម្ពុជាស្ថិតនៅតំបន់ត្រូពិចគឺក្តៅហើយសើម ដែលមានកូអរដោនេភូមិសាស្ត្រស្ថិតនៅត្រង់ចន្លោះខ្សែស្របទី១០ និង ទី១៥ នៃរយៈទទឹងខាងជើង និង ត្រង់ចន្លោះខ្សែបណ្តោយទី១០២ និង ទី១០៨ នៃរយៈបណ្តោយខាងកើត។ អានបន្ត »
សណ្ឋានដីកម្ពុជា
លក្ខណៈទូទៅនៃសណ្ឋានដីប្រទេសកម្ពុជាមានផ្ទៃផតកណ្ដាល ព័ទ្ធស្ទើរជុំវិញទៅដោយភ្នំ និងខ្ពង់រាប។ នៅប៉ែកនិរតី ផ្ទៃដីមានរាងទេរចុះពីជួរភ្នំក្រវាញសំដៅទៅឈូងសមុទ្រ ដែលជាទីសម្បូរកូនកោះ។ គេចែកសណ្ឋានដីនេះជាបួនតំបន់ធំៗ៖
១. តំបន់វាលរាបៈ ទំនាបកណ្ដាលសណ្ដូកពីទិសពាយ័ព្យទៅអាគ្នេយ៍ រហូតដល់ព្រំដែនវៀតណាម ដែលមានក្រលាផ្ទៃ ២៥០៦៩ គ.ម២ ស្មើនឺង១/៣នៃផ្ទៃប្រទេស។ តំបន់នេះ រួមមាន រាជធានីភ្នំពេញ ខេត្តកណ្តាល ខេត្តកំពង់ចាម ខេត្តស្វាយរៀង ខេត្តព្រៃវែង និង ខេត្តតាកែវ។ តំបន់វាលរាបចែកចេញជាពីរគឺ ទំនាបបឹងនិងទំនាបទន្លេបួនមុខ។
២. តំបន់ខ្ពង់រាបៈ ចែកជាពីរផ្នែកគឺខ្ពង់រាបខាងជើងនិងខ្ពង់រាបខាងកើតនិងឦសាន។ ខ្ពង់រាបខាងជើងជាខ្ពង់រាបប្រកបទៅដោយល្បប់ចាស់ ឆ្លាស់គ្នានឹងថ្មបាយក្រៀម និងជាតំបន់ព្រៃរបោះ ។ ខ្ពង់រាបនេះស្ថិតនៅត្រង់ខេត្តបាត់ដំបង ខេត្តសៀមរាប និងខេត្តកំពង់ធំ គឺភ្ជាប់ទំនាបកណ្ដាលទៅជួរភ្នំដងរែក ។ នៅតាមទ្រនុងកណ្ដាលនៃខ្ពង់រាបនេះមានកូនភ្នំដាច់ៗពីគ្នាដូចជា ភ្នំស្វាយចេក ភ្នំកំបុត ភ្នំចុងកាល់ ភ្នំត្បែង ភ្នំគូលែន ភ្នំរយោង។ ខ្ពង់រាបខាងកើតនិងឦសានរួមមានខ្ពង់រាបខេត្តក្រចេះនិងខេត្តស្ទឹងត្រែ ខ្ពង់រាបខេត្តកំពង់ចាម ខ្ពង់រាបខេត្តរតនគីរី និងតំបន់ខ្ពង់រាបមណ្ឌលគីរី។
៣. តំបន់ប្រជុំភ្នំៈ តំបន់ភ្នំចែកជាពីរ គឺជួរភ្នំក្រវាញ និងជួរភ្នំដងរែក។ ជួរភ្នំដងរែកជាព្រំដែនរួមរវាងកម្ពុជា ថៃ។ ជួរភ្នំនេះ សណ្ដូកពីកើតទៅលិច ចាប់ពីជ្រលងទន្លេមេគង្គ ដល់ជ្រលងទន្លេចៅផ្រះយ៉ានៃប្រទេសថៃ។ វាមានបណ្ដោយប្រហែល៣០០គីឡូម៉ែត និងរយៈកំពស់ចុះជាលំដាប់ពីកើតទៅលិចគឺពី៧០០ម៉ែត ទៅ៣០០ម៉ែត។ តំបន់នេះមានព្រៃក្រាស់បង្គួរដែលសម្បូរពូជឈើល្អៗ និងសត្វព្រៃច្រើនប្រភេទ។ ជួរភ្នំក្រវាញស្ថិតនៅទិសនិរតីនៃប្រទេស សណ្តូកតាមបណ្តោយឆ្នេរពីខេត្តកោះកុងដល់កំពត។ ជួរភ្នំក្រវាញចែកជា៣ផ្នែកគឺ៖
- ក្រវាញខាងលិច ក្រវាញកណ្តាល និងក្រវាញខាងកើត។
- ក្រវាញកណ្តាល: មានផ្ទៃខាងទេរពីមោងមកកោះកុង មានកំពូលភ្នំខ្ពស់ គឺភ្នំសំកុះ ១៧៤៤ម៉ែត្រ។
- ក្រវាញខាងកើត : ចែកជាប្រជុំភ្នំបីគឺ ប្រជុំភ្នំខ្ជោល ប្រជុំអូរម្លូរនិងប្រជុំភ្នំដំរី។ ប្រជុំភ្នំខ្ជោលស្ថិតនៅចន្លោះខេត្តពោធិ៍សាត់ និងកំពង់ស្ពឺ មានភ្នំឱរ៉ាល់ ១៨១៣ម៉ែត្រ (ខ្ពស់ជាងគេនៅកម្ពុជា) ប្រជុំអូរម្លូរស្ថិតនៅចន្លោះស្រែអំបិល និងកំពង់ស្ពឺ មានខ្ពង់រាបគិរីរម្យ ៧០០ម៉ែត្រ។ ប្រជុំភ្នំដំរីដាច់ចេញពីប្រជុំអូរម្លូរដោយច្រកពិចនិល និងបញ្ចប់ដោយមុខចំណោតភ្នំបូកគោ (១០៧៥ម៉ែត្រ)
៤. តំបន់មាត់សមុទ្រៈ ស្ថិតនៅប៉ែកនិរតីនៃប្រទស ជាតំបន់ដែលមានរយៈកំពស់ កើតយ៉ាងឆាប់រហ័ស ពីឆ្នេរសមុទ្រទៅទល់ជើងជួរភ្នំក្រវាញ លាតសន្ធឹងលើខេត្តកោះកុង ក្រុងព្រះសីហនុ ក្រុងកែប និងខេត្តកំពត។ តំបន់នេះសម្បូរកូនភ្នំដែលជួនកាលជាកូនភ្នំនៅកណ្ដាលទំនាប ដូចជា ភ្នំជំនាប វាលេញ ហើយជួនកាលទៀត ជាកូនភ្នំលេចពីសមុទ្រដែលជាកោះ ដូចជា កោះកុង (ខ្ពស់ដល់ទៅ ៤១០ ម) ។ ឆ្នេរសមុទ្រកម្ពុជាមានប្រវែង៤៤០គីឡូម៉ែត លាតសន្ធឹងពីចាំយាម (ព្រំដែនថៃ) ដល់ហាទៀង (ព្រំដែនវៀតណាម)។ ឈូងសមុទ្រកម្ពុជា មានជម្រៅទឹកមធ្យមមិនលើសពី៥៦ម៉ែតឡើយ និងមានជំនោរ និងលំនាចពីរដងក្នុងរយៈពេល២៤ម៉ោង។
អាកាសធាតុ
អាកាសធាតុកម្ពុជាក៏ដូចជានៅទូទាំងអាស៊ីអាគ្នេយ៍ដែរបានគ្របដណ្ដប់ដោយខ្យល់មូសុងដែលធ្វើឱ្យមានលក្ខណៈក្ដៅហើយសើម។ កម្ពុជាមានសីតុណ្ហភាពចន្លោះពី ២១ ដល់ ៣៥ អង្សា។ គេចែករដូវនៅប្រទេសកម្ពុជាជាពីរធំៗរដូវប្រាំង និងរដូវវស្សា។ រដូវប្រាំងជារដូវក្តៅហើយស្ងួតចាប់ពីខែវិច្ឆិកាដល់ខែមករា (រដូវរំហើយ) ដែលមានអាកាសធាតុត្រជាក់ស្រួល ហើយចាប់ពីខែកុម្ភៈដល់ខែមេសាគឺមានអាកាសធាតុក្តៅហួតហែង ពិបាកនឹងរស់នៅទាំងមនុស្ស សត្វ និងរុក្ខជាតិ។ រដូវវស្សាចាប់ពីខែឧសភាដល់ខែតុលា ខ្យល់មូសុងបក់មកពីទិសនិរតីដែលជាខ្យល់ក្តៅតែសើម និងមានភ្លៀងធ្លាក់ច្រើនមានឈ្មោះថា (មូសុងវស្សា) ។ ឥទ្ធិពលខ្យល់មូសុងមានស្ទើនៅគ្រប់ទីកន្លែងនៃប្រទេសកម្ពុជាដែលធ្វើឲ្យមានលក្ខណៈពិសេសបង្កើតរបបទឹកភ្លៀង និងរដូវយ៉ាងទៀងទាត់។
ប្រជាជន
ប្រជាជនសរុបរបស់កម្ពុជាមានចំនួន ១៥,២៨៨,៤៨៩នាក់គិតត្រឹមថ្ងៃទី០៣ ខែមីនា ឆ្នាំ២០១៩ ក្នុងនោះមានប្រុស៧,៤១៨,៥៧៧នាក់ និងស្រី៧,៨៦៩,៩១២នាក់។ ចំនួនប្រជាជនសរុបកើនឡើង ១,៨៩២,៨០៧នាក់ ត្រូវនឹង១៤.១ភាគរយ រយៈពេល១១ឆ្នាំ រវាងឆ្នាំ២០០៨ និងឆ្នាំ២០១៩។ ក្នុងនោះក្រុមជនជាតិភាគតិចមួយចំនួនបានតាំងទីលំនៅនៅកម្ពុជារាប់រយឆ្នាំមកហើយរួមទាំងជនជាតិចាម ចិន ឥណ្ឌា វៀតណាម ថៃ គួយ ស្ទៀង និងតាមិល។ ប្រជាជន៧៨ ភាគរយ រស់នៅទីជនបទ។ ប្រជាជន២/៣ ស្ថិតក្នុងវ័យប្រកបការងារ (១៥-៦៤ឆ្នាំ) ប្រហែល២៩ ភាគរយ មាន អាយុក្រោម១៥ឆ្នាំ និងប្រហែល៥ ភាគរយ មានអាយុចាប់ពី៦៥ឆ្នាំឡើងទៅ។ អាយុពេលរៀបការជាមធ្យមគឺ២៣.៧ឆ្នាំសម្រាប់ស្ត្រី និង២៦.២ឆ្នាំសម្រាប់បុរស។ អាយុកាលជាមធ្យម (ចំនួនឆ្នាំដែលមនុស្សអាចរស់បាន)គឺ ៦៧ឆ្នាំ សម្រាប់បុរស និង ៧១ឆ្នាំ សម្រាប់ស្ត្រី។ អានបន្ត »
សាសនា
រដ្ឋធម្មនុញ្ញចែងពីសេរីភាពសាសនាដោយប្រជាជនកម្ពុជាមានសិទ្ធិប្រតិបត្តិសាសនាដោយសេរី ។ រដ្ឋធម្មនុញ្ញហាមប្រាមការរើសអើងដោយសារសាសនា។ យោងតាមរដ្ឋធម្មនុញ្ញពុទ្ធសាសនាគឺជាសាសនារបស់រដ្ឋ។ ប្រជាជនកម្ពុជាប្រហែល ៩៦% កាន់ពុទ្ធសាសនាហិនយាន ហើយសាសនាដទៃទៀតមានប្រជាជនប្រណិប័តន៍ប្រមាណ ៥ % ដែលក្នុងនោះរួមមានៈ សាសនាអ៊ីស្លាម គ្រិស្ដសាសនា និងនិងសាសនាហិណ្ឌូ។ អានបន្ត »
ភាសា
ភាសាខ្មែរគឺជាភាសារបស់ប្រជាជាតិខ្មែរ និងជាភាសាជាផ្លូវការនៃប្រទេសកម្ពុជា។ វាជាភាសាមួយក្នុងចំណោមភាសាដែលចាស់ជាងគេនៅក្នុងតំបន់ហើយវាមានដើមកំណើតមកពីអម្បូរមន។ ភាសាខ្មែរមានព្យញ្ជនៈ ៣៣ ស្រះ ២៣និងស្រះឯករាជ្យ ១២ ហើយត្រូវបានគេចាត់ជាភាសាដែលមានព្យញ្ជនៈនិងស្រះច្រើនជាងគេលើពិភពលោក។ ភាសាខ្មែរទទួលឥទ្ធិពលពីភាសាសំស្ក្រឹតនិងភាសាបាលីព្រោះភាសាខ្មែរបានខ្ចីពាក្យច្រើនពីភាសាអស់នោះ។ ភាសាខ្មែរមានឥទ្ធិពលទៅលើភាសាថៃនិងភាសាឡាវ ។ ភាសាពីរនេះបានខ្ចីពាក្យជាច្រើន ពីភាសាខ្មែរដែល នាំឲ្យពួកអឺរ៉ុបស្មានថាវានៅក្នុងក្រុមភាសាដូចគ្នា។ ភស្តុតាងមួយដែលបង្ហាញអំពីការប្រើតួអក្សរខ្មែរ គឺនៅក្នុងសិលាចារឹកវ៉ូកាញ់ វៀតណាមខាងត្បូងដែលក្នុងសិលាចារឹកនោះមានចុះកាលបរិច្ឆេទឆ្នាំ ៦១១។
ទង់ជាតិ
ទង់ជាតិនៃព្រះរាជាណាចក្រកម្ពុជាបច្ចុប្បន្ននេះត្រូវបានដាក់ឱ្យប្រើប្រាស់ជាផ្លូវការដោយសភាជាតិក្រោយការបោះឆ្នោតជាសកលលើកដំបូង ក្នុងប្រទេសកម្ពុជានាឆ្នាំ១៩៤៧។ ទង់ជាតិនេះតំណាងឲ្យប្រទេសកម្ពុជាស្វយ័តក្នុងសហភាពបារាំង ហើយក្រោយមកក្លាយជាទង់ជាតិនៃប្រទេសកម្ពុជាឯករាជ្យ រហូតដល់រដ្ឋប្រហារឆ្នាំ១៩៧០។ ទង់ជាតិនេះត្រូវបានប្រើប្រាស់ឡើងវិញចាប់ពីការប្រកាសព្រះរាជាណាចក្រកម្ពុជា(ទីពីរ) នាឆ្នាំ១៩៩៣ រហូតមកដល់សព្វថ្ងៃ។ ទង់ជាតិនៃព្រះរាជាណាចក្រកម្ពុជាមាន ៣ ពណ៌ ដែលមានន័យដូចគ្នានឹងបាវចនាជាតិគឺ ជាតិ សាសនា ព្រះមហាក្សត្រ។ ពណ៌សតំណាងឱ្យសាសនា សន្តិភាព ពណ៌ក្រហមតំណាងឱ្យជាតិគឺទឹកដីនិងប្រជាជន ពណ៌ខៀវតំណាងឱ្យព្រះមហាក្សត្រនិងព្រះអគ្គមហេសី។ ប្រាសាទអង្គរវត្តតំណាងឲ្យសាសនាព្រះពុទ្ធនៃប្រទេសរួមជាមួយកិត្តិយសនិងមរតកនៃប្រជាជនខ្មែរ។
ផ្កាតំណាងជាតិ
ផ្ការំដួលគឺជារុក្ខជាតិដែលឃើញមានដុះលូតលាស់ដោយធម្មជាតិស្ទើរគ្រប់ទីកន្លែងនៅក្នុងប្រទេសកម្ពុជា។ ប្រទេសកម្ពុជាបានកំណត់យករំដួលធ្វើជាផ្កាតំណាងអត្តសញ្ញាណរបស់ជាតិតាមព្រះរាជក្រិត្យចុះថ្ងៃទី២១ ខែមីនា ឆ្នាំ២០០៥។ ការសម្រេចយករំដួលជាផ្កានិមិត្តរូបរបស់ជាតិនេះក៏ដោយសារតែផ្ការំដួលមានក្លិនក្រអូបឈ្ងុយឈ្ងប់ គួរជាទីទាក់ទាញ និងផ្តល់នូវអត្ថប្រយោជន៍ច្រើន នៅក្នុងសង្គមខ្មែរ។ ផ្ការំដួលមានពណ៌លឿង ស ក្រហម មានក្លិនសាយឆ្ងាយ ដែលចាស់បុរាណ តែងប្រៀបទៅនឹងក្លិនស្រីក្រមុំ។ ផ្ការំដួល ដុះចេញពីខ្នែងមែកមានពីរស្រទាប់និង៦ត្របក រៀបគ្នាជាពីរស្រទាប់មានបីត្របក មានក្លិនក្រអូបឈ្ងុយឈ្ងប់ រីកនៅពេលល្ងាច និងសាយក្លិនក្រអូបតាមខ្យល់បានឆ្ងាយ។ ខ្មែរពីបុរាណ បាននិយមប្រើប្រាស់ ផ្ការំដួល ធ្វើជាគ្រឿងផ្សំផលិត ជាក្រមួនលាបមាត់របស់នារី ព្រោះតែក្លិនរបស់វាក្រអូបឈ្ងុយ ខុសប្លែកពីផ្កាដទៃ។ ទន្ទឹមនោះ រំដួលមានគុណប្រយោជន៍ខាងឱសថ ក្នុងការកែរោគ ដូចជា សំបកអាចឆ្នៃធ្វើជាឱសថសម្រាប់ព្យាបាលអាការៈក្តៅខ្លួន ផ្កាអាចយកទៅធ្វើជាថ្នាំបំបាត់អាការៈវិលមុខ ខ្យល់គរ ជាឱសថជំនួយបេះដូង ជំនួយឈាម។ កេសររបស់រំដួល អាចផ្សំជាឱសថជំនួយកម្លាំង ជំនួយឈាម និងជួយបំបាត់អាការៈវិលមុខ និងខ្យល់គរ។ ដូច្នេះប្រជាជនខ្មែរគ្រប់រូបពិសេស យុវវ័យខ្មែរទាំងអស់ ចូរចងចាំ និងធ្វើខ្លួនអោយមានក្លិនក្រអូប និងស្រស់ស្អាតដូចជាផ្ការំដួលដែលតំណាងអោយប្រទេសក៏ដូចជាខ្លួនផ្ទាល់។
ប្រាក់រៀល
ប្រាក់រៀល (រៀល) ជារូបិយប័ណ្ណផ្លូវការ ប៉ុន្តែប្រាក់ដុល្លាអាមេរិចក៏ត្រូវបានប្រើប្រាស់សម្រាប់ការទូទាត់ក្នុងទីផ្សារនៃព្រះរាជាណាចក្រកម្ពុជា។ មួយដុល្លាអាមេរិចអាចប្តូរបានក្នុងរង្វង់ បួនពាន់រៀល អាស្រ័យលើអាត្រាប្តូរប្រាក់ផ្លូវការ។
លិខិតឆ្លងដែន
លិខិតឆ្លងដែនធម្មតានៃព្រះរាជាណាចក្រកម្ពុជា គឺជាឯកសារបញ្ជាក់ថាជនដែលកាន់លិខិតឆ្លងដែននោះ ជាពលរដ្ឋខ្មែរ ដែលមានសិទ្ធិសុំទិដ្ឋាការឆ្លងដែនបាន។ លិខិតឆ្លងដែនធម្មតានៃព្រះរាជាណាចក្រកម្ពុជា គឺជាឯកសារផ្លូវច្បាប់តែមួយគត់ដែលអនុញ្ញាតឲ្យពលរដ្ឋ ខ្មែរប្រើប្រាស់សម្រាប់ធ្វើដំណើរឆ្លងដែនទៅក្រៅព្រះរាជាណាចក្រកម្ពុជា។ ចំពោះតម្លៃ និងពេលពេលវេលាត្រូវបានកំណត់ដូចខាងក្រោមនេះ៖
សម្រាប់មនុស្សចាស់
- សេវារយៈពេល ១៥ថ្ងៃ តម្លៃ ០១ក្បាល ១០០ដុល្លារអាមេរិក
- សេវារយៈពេល ៧ថ្ងៃ តម្លៃ ០១ក្បាល ១៥០ដុល្លារអាមេរិក
- សេវារយៈពេល ១ថ្ងៃ តម្លៃ ០១ក្បាល ២០០ដុល្លារអាមេរិក
សម្រាប់កូនក្មេង
- សេវារយៈពេល ១៥ថ្ងៃ តម្លៃ ០១ក្បាល ៨០ដុល្លារអាមេរិក
- សេវារយៈពេល ៧ថ្ងៃ តម្លៃ ០១ក្បាល ១២០ដុល្លារអាមេរិក
- សេវារយៈពេល ១ថ្ងៃ តម្លៃ ០១ក្បាល ១៦០ដុល្លារអាមេរិក
ទិដ្ឋាការ
Visa on Arrival អាចទទួលបាននៅបញ្ជរទិដ្ឋាការនៅពេលមកដល់ព្រលានយន្តហោះអន្តរជាតិភ្នំពេញនិងតាមច្រកអន្តរជាតិផ្សេងទៀត។ ដើម្បីចូលក្នុងព្រះរាជាណាចក្រកម្ពុជាបាន លោកអ្នកត្រូវមានលិខិតឆ្លងដែនមានសុពលភាពប្រាំមួយ (៦)ខែ និងទិដ្ឋាការមានសុពលភាព (លើកលែងតែសញ្ជាតិមួយចំនួន) រាប់ទាំងកូនក្មេងផងដែរ។ ទិដ្ឋាការប្រភេទទេសចរណ៍ និងធុរកិច្ចមានសុពលភាពមួយខែ គិតចាប់តាំងពីថ្ងៃចូលក្នុងប្រទេសកម្ពុជា។ លោកអ្នកអាចបន្តទិដ្ឋាការបាននៅក្នុងអំឡុងពេលស្នាក់នៅក្នុងប្រទេសកម្ពុជា។
- ទិដ្ឋាការប្រភេទធុរកិច្ច (E)
- ប្រភេទទិដ្ឋាការធុរកិច្ច (E) អាចបន្តបានរយៈពេលមួយខែ បីខែ ប្រាំមួយខែ ឬ១២ខែ ក៏បាន (វាអាចជាទិដ្ឋាការចូលតែម្តង ឬចូលបានច្រើនដង)។
- ទិដ្ឋាការប្រភេទទេសចរណ៍ (T)
- ទិដ្ឋាការប្រភេទនេះអាចបន្តបានមួយខែ បានតែ១ដងទេ។ ពាក្យសុំទិដ្ឋាការ
- ទិដ្ឋាការអាចសុំបាននៅបញ្ជរទិដ្ឋាការពេលមកដល់អាកាសយានដ្ឋានទាំងបី គឺនៅភ្នំពេញ សៀមរាប និងក្រុងព្រះសីហនុ។ ទិដ្ឋាការអេឡិចត្រូនិក
- ទិដ្ឋាការអេឡិចត្រូនិក មាននៅលើវេបសាយរបស់ក្រសួងការបរទេស និងសហប្រតិបត្តិការអន្តរជាតិ។ លោកអ្នកក៏អាចសុំទិដ្ឋាការបែបនេះបាននៅស្ថានទូតខ្មែរដែលនៅជិតបំផុត ក្នុងប្រទេសរបស់លោកអ្នក។
មធ្យោបាយដឹកជញ្ជូន
ប្រទេសកម្ពុជាមានមធ្យោបាយដឹកជញ្ជូន ៣ប្រភេទសំខាន់ៗដូចជា ផ្លូវគោក ផ្លូវទឹក និងផ្លូវអាកាសសម្រាប់ធ្វើដំណើរ និងដឹកជញ្ជូនទំនិញផ្សេងៗនៅក្នុងប្រទេស និងក្រៅប្រទេស។ ក្នុងនោះផងដែរ គេបែងចែកផ្លូវគោកជាពីរប្រភេទគឺ ផ្លូវថ្នល់ និង ផ្លូវដែក។ ផ្លូវដែកប្រទេសកម្ពុជាយើងមាន ២ខ្សែខ្សែទី១ ចេញពីភ្នំពេញទៅអូរជ្រៅ មានប្រវែង ៣៨៥គ.ម និងខ្សែទី២ចេញពីភ្នំពេញទៅក្រុងព្រះសីហនុ មានប្រវែង ២៦៦គ.ម។ ផ្លូវទឹកដែលសំខាន់គឺទន្លេមេគង្គ (ពីក្រចេះដល់សមុទ្រ)។ ប្រទេសកម្ពុជាមានកំពង់ផែភ្នំពេញដែលអាចឲ្យនាវាសមុទ្រចតបានសឹងគ្រប់រដូវនិងកំពង់ផែក្រុងព្រះសីហនុជាកំពង់ផែអន្តរជាតិ។ អាកាសយាន្តដ្ឋានសំខាន់ៗនៃប្រទេសកម្ពុជាយើងគឺ អាកាសយាន្តដ្ឋានអន្តរជាតិភ្នំពេញ សៀមរាប និង ក្រុងព្រះសីហនុ។
អត្ថបទពេញនិយមបន្ទាប់ ៖ ម្ហូបខ្មែរ